اخوانى الكرام
انا طبعا هتتكلم عن الحب الشائع (واحد وواحدة)
الموضوع ده كان شاغل بالى من فترة
لإن انا بشوف حاجات غريبة فى الموضوع ده خلتنى اسأل نفسى هو ده الحب اللى كل افلامنا المصرية (التافهة) بتتكلم عنه !!
و خصوصا لما بلاقى ان واحد بيحب واحدة علشان معاها n70 و التانى بيحب 3 فى وقت واحد و بيقول ان الـ3 حب حقيقى
و التالت عامل لسته فيها ولا 20 واحدة و بيحبهم و الرابع كل اسبوع يغير واحدة ........ etc
*-*-*-*-*-*-*
بدأ الموضوع فى دماغى بالسؤال ده
ايه علاقة الحب بالقلب ؟؟
و اخوانا الحبيبة طبعا اكدوا ان القلب مصدر الحب و اسألهم ايه المبرر مايعرفوش يردوا
قولت اسأل متخصصين فسألت ابويا (دكتور) بس بإسلوب غير مباشر طبعا ..
قالى ان فيه غدة معينة بتخلى القلب نبضاته تبقى سريعة فى احساسات زى الخوف و كده
--- بعد كده تطور بيا التفكير لإنى اصل ان مفيش حب اساسا ---
و سيتم توضيحه فى هذه النقاط
أولا : مفيش فرق بين البنت و الولد
او على رأى سعاد حسنى (البنت زى الولد)
بعد بحث و تفكير وجدت ان الفروق الوحيدة بين البنت و الولد حاجتين
1- التكوين الجسمى 2- المعاملات الاجتماعية
و طبعا المعاملات الاجتماعية دى احنا اللى وضعناها و قابلة للتغيير
و السبب فى وجودها بهذه الطريقة هو برضه التكوين الجسمى
و انا قصدى بالموضوع ده ان كلا النوعين ممكن يكونوا كاذبين أو صادقين
هايفيين أو جادين , رخميين أو ظرفاء
يعنى على افتراض انك حبيت واحدة ايه اللى ممكن تلاقيه فرق عن واحد صاحبك
اكيد هاتبقى رخمة فى بعض الاوقات و اكيد هاتكذب عليك فى بعض الحاجات و...و..و.....
ثانيا : الحب صداقة مغلفة
ايه الاسباب اللى بتخليك تصاحب واحد ؟
حاجة من اتنين 1- التوافق 2- المصلحة (و دى طبعا مش صداقة حقيقية)
لكن انا فى رأيى ان الحب فى الحقيقة عبارة عن صداقة سببها التوافق (طبعا مش هاتحب واحدة علشان عاوز منها مصلحة)
أى بمعنى ان ممكن تكون ( افكاركم , اهدافكم , طرق تفكيركم ) متقاربة او متشابهة....
يعنى برضه انك لو حكيتلها على مشكلة هاتفهمك.
لكن طبعا ملهاش صلاحيات الصديق الكاملة
يعنى مثلا ماتقدرش تحكيلها على كل حاجة (تقدر تقول لواحد صاحبك على موضوع لكن ما تقدرش تقولهولها)
ماتقدرش تخرج فى اى وقت معاها ( يعنى لو انت مخنوق من البيت الساعة 12 بالليل ممكن تعدى على واحد صاحبك و تتمشوا سوا)
و اسباب كتييير اغلب اسبابها المعاملات الاجتماعية اللى حددها المجتمع اللى احنا فيه
أى تقدر تقول ان الحب هو نوع متدنى من الصداقة
ثالثا : الانبهار مصدر هذا الوهم
و هنا هاتكلم على نقطتين 1- الانبهار بالموضوع ككل 2-الانبهار بالفتاة
::::: الانبهار بالموضوع ككل ::::::
بحكم المجتمع بتفضل ما يسمى بالحب عن الصداقة
لإن طبعا حكاية انك بتحب و بتكلم بنات و كده مش شائعة فى مجتمعنا
لكن كل واحد ليه اصحابه و دى عادية
لذلك احنا بنمشى على مبدأ (الممنوع مرغوب) و بتنبهر بنفسنك لما بتلاقى واحدة بتحبك مثلا أو انت بتكلم بنات
::::: الانبهار بالفتاة ::::::
لما تلاقى واحدة جميلة وشيك و جذابة اكيد بتنبهر بيها و ده عادى و طبيعى
و ده للأسباب التالية 1- التكوين الجسمى 2- مبدأ الممنوع مرغوب
بس مش الطبيعى انك فى لحظة تقلب هذا الانبهار إلى حب (و ده اساسا اللى بيحصل فى 100% من قصص الحب)
و بذلك انقلب الموضوع من انبهار إلى وهم
رابعا : من الآخر
أنت لو ركزت نظرك على اى بنت بطريقة واضحة هاتلاقيها و بدون تفكير بادلتك نفس الفعل
و بقت العملية (Love Story) فى ثوانى ...... و العملية دى شغالة بنسبة 90 % و مافيهاش فصال
أما لو حصل العكس و البنت هى اللى بتبصلك برضه هاتكون نفس النتيجة
بس الفرق هنا ان العملية بتكون شغالة بنسبة 100 % و برضه مافيهاش فصال
و هذا هو الحب ...........!
*-*-*-*-*-*-*-*
و نتيجة الكلام ده ان مفيش حاجة اسمها حب و ما هى إلا شىء احنا اخترعناه و وهمنا نفسنا بيه
و برضه علشان الشباب فاضى و مش لاقى حاجة يعملها آمن بالموضوع ده ايمان تام
مع ان كل الفشل و المشاكل اللى احنا فيها بسبب الموضوع ده
ملاحظات مهمة
1-فى عقلى مليون سبب و سبب لعدم وجود الحب بس انا اكتفيت بدول علشان لسه ما صيغتش باقى المبررات
فى نقط و برضه علشان الامتحانات
2- علشان ماحدش يفكر ان انا بنيت كلامى على تجربة حب فاشلة .. أنا اساسا ما عشتش قصص حب اساسا
و طبعا السبب انى مش مقتنع بإن فيه حب ...... و كلامى ده بناء على ملاحظة قصص الحب اللى بشوفها حولى
و خصوصا ان انا عارف تقريبا نص قصص حب مصر من خلال الاصدقاء و الاهل و برضه الحاج اسامة منير اللى
الشعب كله بيشوفه واتعلم الحب على ايديه من سن ( 3 : 300 ) سنة
و بالمناسبة انا بعتله SMS امبارح بإنى مش مقتنع بالحب علشان يتناقش فى الرسالة دى بس ماعبرش فيا ولا قال الSMS
3- انا كنت ناوى أأجل الموضوع ده للأجازة بس لقيت ان انا مش عارف اذاكر خالص منه
*-*-*-*-*-*-*-**-*-*-*-*-*-*-**-*-*-*-*-*-*-**-*-*-*-*-*-*-*
طبعا محتاج رأيكم فى الموضوع ده و أنا مرحب بكافة الردود و التعليقات
****
ممنوع نقل هذا الموضوع لأى منتدى آخر إلا بإذن منى لأنه أنا صاحب النظرية دى
« آخـــر الــمــواضــيــع »
النظرية التى ستقلب العالم رأسا على عقب(مفيش حاجة اسمها حب) 
