قهر عنقودي متقزم

في مشهد عبقري في مسلسل اوان اورد كانت يسرا و صاحبتها بيحضروا تصوير برنامج تليفزيوني عن الهروب من المنزل وفيه قالت دكتوره الاجتماع اللي مستضيفينها ان الهروب من المنزل ناتح من القهر العنقودي المتقزم

مش عارف ليه افتكرت المشهد ده من يومين و افتكرت برضه بعض الجمل اللي كنا بنألفها تريقه عليه زي انبثاق محوري متفاقم , تجعد نفسي متحوصل.. تحوصل بنيوي متأصل..... الخ
علي العموم مش ده موضوعنا .. موضوعنا عن الفقعه ما هي الجمله اللي كل ما تسمعها تحس ان مرارتك اتفقعت لدرجه تحس انك مش طايق و امل حياتك تقوم تكسر التليفزيون او الراديو او دماغ اللي قدامك لولا بس انك خايف من ابوك (لو كان التليفزيون) ومن المسائله القانونيه (لو كانت دماغ اللي قدامك)...
مثلا انا بتفقع كتير احتمال لأني شخص عصبي يعني كل مااتفرج علي برنامج ثقافي لازم الاقي المتخلف اللي مستضيفينه بيقول الجمله الابديه:ارهاصه فكريه معاصره.....طيب يعني ايه ارهاصه ىحد يقولي عشان محسش اني غبي قدام نفسي

حاجه تانيه تغيظ الاخبار.. كلها مقتل مصرع لقي حتفه .. قضي نحبه.. اصيب من جراء انفجار.. تداعيات الموقف الراهن... الخ
كلها جمل محفووووووظه حاجه تعل فعلا..
يغيظ اكتر ان الجمل المحفوظه دي هي السمه المميزه الثابته في كل ادبنا لا للتجديد ده شعارنا
و اللي بيجدد بنقوله وهو انت بقي اللي هتغير الكون
و اللي شايف نفسه بيجدد فعلا بيبقي غالبا بيقلد الطريقه الامريكاني في الكتابه كأنه بيترجم مش بيكتب فعلا

الموضوع ده يا جماعه عباره عن ارهاصه فكريه معاصره تمخض عنها وعيي الدبي في الاونه الاخيره

من الاخر يعني تخاريف

فياريت اللي يحب يخرف معايا اهلا و سهلا
اللي يحب يتريق برضه اهلا و سهلا
اللي يحب يشارك و يقول ايه فعلا اكتر جمل بتفقعه يبقي يا مرحبتين بيه فعلا

الموضوع هنا لك مطلق الحريه انك تقول اللي نفسك فيه ايا كان
وكفايه كده بقي
سلاااااااااااااااام

__________________